NURANƏ NUR

EŞQİM

 

Kölgəsi özündən böyük,

Köləsi özündən yazıq, eşqim!

Yeni adət deyil ki, ayrılıq,

alışarsan.

Bilmirəm kim itirdi səni,

mən tapdım.  

 

QATAR

 

Getdi,

    Kiçildi,

              Əridi,

                          yox oldu o boyda qatar.

Apardı

            Səni,

                     Məni

                               Bizi.

Doldurduq vaqonlara ayrılıqları,

                         Çətin taparıq bir-birimizi.

Bəlkə mən baxmasaydım ardınca

 

Belə sürətlə getməyəcəkdi.

Sən olmasaydın içində.

Kamına yetməyəcəkdi,

O qatar.

Necə darıxmışam

Indidən sənsiz.

Zamanın üzünü necə çevirim?

Elə bilməsin ki, o zalım qatar,

Olacaq bu imiş,

                      bitdi,

                                  qurtardı.

Elə bilməsin ki bu gedişiylə,

Məni sənsiz qoydu,

                     mənsiz apardı.

 

 

HEÇ BÖYÜMƏMISƏN

 

Görüşə gəlmisən keçmisinlə

əllərində bir qucaq süni umid çələngi,

gözlərində cavabını

tək özün bildiyin suallar,

dilində

yalanlarını isbat edən andlar.

daha nə deyim

yenə  o sənsən.

Hisslərin kirayə paltarın kimi

Hələ də ruhuna boyuk gəlir.

Heç boyuməmisən.

 

BİLMİRƏM

 

Ürəyimlə sual-cavab,

Günboyu söhbət edirəm.

Özümləyəmmi,səninləyəmmi?

Bilmirəm.

Düşündüklərimi deyil,

məcbur olanı deyirəm.

Mən beləyəmmi?

Bilmirəm.

Bir sən varsan,yanımdasan.

Mən də sənin yanındayam.

Qəlbindəyəmmi?

Bilmirəm.

 

DÖNMƏ

 

Dönmə, dön desəm belə

Qoy bir az yol çəksin gözlərim hələ,

Gözləyib yorulan deyiləm daha.

Qəlbimdə nə istək, nə mərhəmət var,

Qoy imkansız olsun, bütün imkanlar.

Dönmə, dön desələr belə.

Suallar, şübhələr

Səni parçalayıb, yesələr belə,

Dönmə.

Dönmə indən belə gözləyənin yox!

Mənsə dönməliyəm gözləyənim var.

Niyə açılmır, bu sonuncu səhər?

Gözləyir məni axı,

Nə vaxtdır cəsarət edə bilməyib,

İçə bilmədiyim bir qram zəhər.

 

YENƏ SƏNSİZ

 

Yenə gəldin...

Gətirdin xatirələri.,

başımı qatmağa.

Başlayırıq...

yaşanmayan istəkləri

yaşatmağa.

 

Sən mənə deyə bilmədiklərini dedin.

Mən sənə baxıb

köks ötürdüyümü  unutdum.

Sən mənim belimdən,

Mən sənin çiynindən tutdum.

 

Rəqs edirik,

Qəlbimizin musiqisinə.

Bu,dünyada sözü və səsi olmayan

ən gözəl əsərdir.

 

Utanıram...

Nəfəsin çox yaxındadır,

Gözlərin çox işıqlıdır.

 

Utanıram...

Gözlərini qapa bir az,

mən də yumum.

Bir az belə gülümsəyək.

 

Sevgimizin alovunu geyinmişik əynimizə

Eşqimizin qanadında bir az uçaq.

Indi açaq,

Aç.